KILALAHON NATON ANG TUMANDOK NGA MANUNULAT KAG ANG IYA MGA SINULATAN

ROMEO M ROULLO

Mamalaybay kag Manunolat sa pulong Hiligaynon

2023 Gawad Pambansang Alagad ni Balagtas – Tula sa Hiligaynon

Natawo sa San Agustin, Hinigaran, Negros Occidental, Marso 20, 1945 sa mga ginikanan nga sanday Tiburcio Pabon Roullo kag Segunda Ningas Miona. Kasado kay Narcia M. Dalguntas kag may pito ka mga anak nga sanday Roy, Florante, Alane May, Arnold, Ronald, Ruby kag Eva Ronnah.

Gradwado sa two year Secretarial Course kag Bachelor of Arts. Nagsugod sulat sang mga binalaybay kag malip-ot nga sugilanon para sa Hiligaynon kag Yuhum sang yara pa sa elementarya. Nangin Assistant to the Editor sa English Section kag katapu sa Filipino Section sang apat ka tuig sang The Southern Vlley Star sang Koronadal High School. Gintawag nga Writer of Koronadal High School.

Nagpangalagad sa Provincial Government sang South Cotabato bilang Technical Assistant, Information Writer kag Provincial Information Officer. Nangin reporter kag anchor sa programa sang pangulohan sang South Cotabato sa mga waragwagan sang DXKR sa Koronadal kag DXCP sa General Santos City.

-Nagdaug sang Ikatlo nga padya sa Tumandok 79 sang Yuhum sa iya nobelita nga Zorayda

-Nagdaug Nahauna nga padya sa Quin Baterna Literary Contest sa Hiligaynon sadtong Hunyo 14, 1997 sa iya malip-ot nga sugilanon nga Demolition.

-Nakaagum mga Pinasahi nga Padya gikan sa Quin Baterna Literary Contest sa pila ka kahigayunan sa iya mga malip-ot nga sugilanon nga Tuhay ang Duag sang Gugma, Sila ang mga Baganihan, Daku nga Baha kag Madabong nga Kawayan.

KON MAY GINSUGORAN

(Triolet Poetry Form)

Kon may ginsugoran

May yara nga katapusan

Ining’ pulong talandaan

Kon may ginsugoran

Natagna sa kalibutan

Napagkit pulong balaan

Kon may ginsugoran

May yara nga katapusan

Philippines 10 June 2026

ANG SARI SANG ABYAN

(Ambalaybay)

Kon ikaw may abyan, maayo mang-intu,

Malipay ka ayhan, magkabig nga abyan?

Ang iya ugali, tunay gid nga maru,

Nga sang pagsalig mo, dapat nga likawan!

Maayo nga abyan, sia ang makaunong,

Sa aton kalipay, ukon sa kasakit.

Pero, kon sia abyan, kalain wa’y tupong,

Sikwayon mong’ abyan, kay manugpanghalit!

Maayo nga abyan, ‘budlay pangitaon,

Kay may yarang’ abyan, ikaw ang luiban.

Malaot nga abyan, indi mo sumpaon,

Ang akon mapayo, dapat mo likawan!

Ang maru nga abyan, daw kahalam-utan,

Iya ka intuon, ukon pagmaruan!

 

Ginbantala sa Hiligaynon Magazine

Sang MANILA BULLETIN Hulyo 4, 201818 ~