BAHANDING BILIDHON (Tumandok, Du-og kag mga Sinulatan)

Sadtong nagabutho pa ako sa Iloilo Central Elementary School tuig 1971-77 amo man kag gintukod ang Museo Iloilo. Kag sang ara na ako sa ikatlo nga grado sang tuig 1973, ang amon manunudlo nga si Gg. Pineda nagdala sa amon sa bag-o lamang bukas nga Museo.

Natingala kag nalipay ako sa katahom sang museo. Una nga kahigayunan abi nga makakita ako sang mga sinauna nga mga butang nga gintipigan kag karon naka dagay sila agod makahatag kinaalam tuhoy sa kasaysayan.

Bangod malapit lamang ang museo sa amon eskwelahan, kon may libre nga tion nagadagon-dagon ako padulong didto. Nalingaw ako sa pagtukib sang mga maragtas angot sa kasaysayan sang Iloilo. Diri nagsugod ang akon pagtipig sang mga butang nga nabilin sang akon nagtaliwan nga lola. Ang iya aparador nga suno sa iya ginhatag pa sang iya nanay sadtong tuig 1920 ara man gihapon sa akon kuwarto. Indi na ini kaangay sang una nga disenyo bangod dumaan na ini apang nahimo ko ini nga mapreserba kag gingamit nga tokador nga nagaseparar sa akon tulogan kag palanrebahoan (work station).