Diretso sa Bukid

Ni John Iremil Teodoro

PAMATYAG ko daw taga-Aningalan rën gid ako. Disyembre 2022 kang una kami magsaka rugto kang partner ko nga si Jay. Sobra rën sa tatlo ka tuig nga pabalik-pablik kami rugto kag kadya may hardin kag kamalig rën kami sa Aningalan. Ang container van cottage sa Aningalanja nga pabarito namën nga arkilahan, mag-umpisa kang Pebrero, ginaarkilahan rën naman kang long term amo ria nga pamatyag ko, may balay rën gid kami sa manami nga lugar nga dya sa ibabaw kang bukid.

Rëgya ako sa Antique kadya para sa 14^th KRITIKA La Salle National Workshop on Art and Cultural Criticism kang ginapamunuan ko nga Bienvenido N. Santos Creative Writing Center kang De La Salle University hay ang host kang workshop kadya nga tuig amo ang University of Antique (UA) sa banwa lang Sibalom. Rëgya kami sa UA sa Marso 22 asta 29.

Lunes ang umpisa kang workshop pero Sabado pa lang naglëpad rën ako pauli dya sa Antique hay kinahanglan ko makipagmiting sa mga abyan ko nga opisyales kang Hayahay sa Ambon Association, Inc., ang organisasyon kang mga business owner sa Aningalan. Kang nagligad nga Enero, gin-imbitar nanda ako nga mangin Festival Artistic Director kang 2^nd Aningalan Arts Festival nga pagahiwatën sa Abril.

Kang Biyernes kang gabii, nakabaton ako kang mensahe sa Messenger halin kay Doc Robler Pechueco, ang presidente kang Hayahay, nga kon mahimu ma-attend ako kang barangay council meeting kang Aningalan sa Sabado ti aga hay sa Iloilo pa kuno tana kag mga tag-irigma rën makaabot sa Aningalan. Hambal ko kay Robler, basta indi lang ma-delay ang flight ko, maka-attend ako. Si Robler ang tag-iya kang Aningalanja nga klasmeyt ko kato sa preparatory school kang Assumption Sisters sa San Jose de Buenavista.

Alas-siyete y diyes ang flight ko halin sa NAIA kag ang estimated time of arrival sa Evelio B. Javier Airport mga 8:30 sa aga. Maabutan ko gid ang barangay council meeting kon makahalin ako sa aiport kang 9:00 hay sangka oras man lang ang biyahe pabukid. Gin-message ko dayon si Jay nga sa pag-abat na kanakën sa airport madara rën tana kang pang-overnight ka nga mga bayu para madiretso kami saka sa Aningalan hay may meeting ako. Ang sabat na, may mga bayu kuno tana sa cottage namën sa Aningalanja.

Imaw ko sa flight ang abyan ko nga si Roland Tolentino, kritiko kag propesor sa University of the Philippines Diliman, ang workshop director kang KRITIKA. Tëngëd Dominggo pa maabot ang iban nga imaw namën nga mga workshop panelist, ginpamangkot ko tana kon ano ang plano na for Saturday sa Antique. Wara kuno. Ginpamangkot ko tana kon basi gusto na magtawas kanamën ni Jay sa bukid. Game man tana. Sa NAIA pa lang antes ang amën flight, gin-message ko dayon ang amiga ko nga si Diding, ang manedyer kang Banglid Dos, nga mag-reserve kang sangka cottage para kay Roland. Indi abi puwede nga sa Aningalanja ma-stay si Roland hay tam-an ka hina rugto ang internet connection kag wara it hot shower hay wara it koryente. Ang masarangan kang solar power system rugtro ang mga sulô kag charging portal lang para sa cellphone kag laptop. Para kanamën ni Jay, bastante rën dya. Tag-irigma lang kami nagaparigos para bëkët tam-an ka ramig ang tubig.

Nangin mabungahën man ang miting ko sa barangay council. Mayad hay nakakitaay rën kami kang baranggay kapitan. Naistorya ko kananda ang mga plano namën para sa 2^nd Aningalan Arts Festival kag suportado nanda dya. Mabulig sanda kapin pa gid sa Komposo Writing and Singing Contest. May sangka kagawad nga nag-volunteer nga tana ang mangita kang mga kontestant.

Samtang nagamiting ako, ginlagaw ni Jay si Roland sa Aningalan. Nag-agto sanda sa Provincial Green House kag natabuan nga may nagapamunga nga mga istroberi amo nga nag-strawberry picking sanda. Pagkatapos nag-agto sanda sa Danaw Lake kag namuksi man kang mulberry hay natabuan liwan nga duro ang mga lutô nga bunga. Ginpakita pa gani ni Roland kanakën ang mga tudlo na nga may mantsa kang mga istroberi kag mulberry kang magkitaay kami sa Banglid Dos para mag-igma.

Ang sara pa nga nagapasiri kang pamatyag ko nga taga-Aningalan rën gid ako amo ang magkaën sa Banglid Dos. Magluwas nga tam-an ka tahëm ang view kang mga bukid halin rëgya namit pa ang pagkaën. Pareho kami ni Jay nga nagapati nga ang the best food sa Aningalan ang sa restawran man gihapon kang Banglid Dos. Ang problema lang namën ni Jay kon kis-a, tam-an ka duro ang mga tawo sa Banglid Dos.

Ang paborito nga dapli namën ni Jay sa Banglid Dos amo ang ginisa nga ugbos kang sayote. Kadya nga mga inadlaw daw duro ang ani kang sayote hay duro ang nagabaligya kadya sa mga binit-karsada kag PhP15 lang kada kilo. Asta kadya kon makakita ako kang sayote, ang thought bubble ko: “So Baguio!” Pero amat-amat rën nga nagabag-o ang panërëkan ko sa sayote. Nagatubo dya sa Aningalan kag paborito gani namën ang ugbos kadya nga gingisa.

Sa Aningalan gid ako maistar sa pira ka adlaw kon magretiro rën ako sa De La Salle University. Pero sa kadya samtang nagaobra pa ako sa Manila, kon mag-uli ako rëgya sa Isla Panay, sa Iloilo Airport ukon sa Evelio B. Javier Airport man ako maghëgpa, laban-laban sa Aningalan gid ako madiretso.

***

Si John Iremil Teodoro nga taga-San Jose de Buenavista, Antique sangka full professor sa Departamento kang Literatura kang De La Salle University sa Manila kon diin tana man ang direktor kang Bienvenido N. Santos Creative Writing Center. Nangin Sekretaryo Heneral tana kang Unyon ng mga Manunulat sa Pilipinas (UMPIL). Ginbaton na ang S.E.A. WRITE Award halin sa Kaharian kang Thailand katong 2019.