TTGINP PAMB Nagpatigayon sang Workshop para sa Protected Area

1 of 3

Ang Taklong and Tandog Group of Islands Natural Park (TTGINP) Protected Area Management Board (PAMB) nagpatigayon sang workshop sang nagligad lang nga Enero 14, 2026, sa bag-o nga Municipal Hall sang Nueva Valencia, Barangay Poblacion, Nueva Valencia, Guimaras.

Ang tinutuyo sini amo ang pagrepaso sang Department Administrative Order (DAO) 2019-05 kag paghimo sang Implementing Rules and Regulations (IRR) para sa Republic Act No. 12225, nga nagdeklarar sa TTGINP bilang isa ka protected area sa idalom sang National Integrated Protected Areas System (NIPAS), lakip na ang gin-propose nga IRR para sa nasambit nga Protected Area.

Ang nasambit nga aktibidad ginpondohan sang LGU sang Nueva Valencia kag gintambungan sang mga miyembro sang PAMB, lakip na ang mga katapo sini halin sa  Department of Environment and Natural Resources (DENR) Region VI nga ginpangunahan ni PENR Officer sang Guimaras nga si Forester Juliet T. Gabayeron, Provincial Local Government Unit (LGU) sang Guimaras, Municipal LGU sang Nueva Valencia, UP Visayas, Department of Agriculture–Bureau of Fisheries and Aquatic Resources (DA–BFAR), kag ang nagkalain-lain nga People’s Organizations.

Ang workshop ginpangunahan ni TTGINP Protected Area Superintendent (PASu) Rhett Arthur Diana.

Paagi sa pagpulong-pulong ukon focused group discussion, gin-usisa sang mga tumalambong ang mga importante nga mga ginapatuman kag naghatag sang mga rekomendasyon angot diri.

Ginpatigayon ang amo nga workshop agud masiguro nga ang IRR nangin legal, naglakip sang tanan nga importante, kag nahisuno sa mga pamaagi sunod sa sakto nga pag-atipan sang protected area kag sa kinahanglanon sang komunidad.

Ini nga tikang nagapabakod sang pagbuligay sa pagdumala kag sang mga hilikuton para sa ikaayo sang TTGINP, publiko, kag sang palibot. (DENR-6)