SWK-WVSU, nagsagawa ng Panlalawigang Seminar sa Korespondensiya Opisyal

Isinusulong ng Sentro ng Wika at Kultura ng West Visayas State University (SWK-WVSU) ang pagpapataas ng antas ng paggamit ng wikang Filipino sa pamamagitan ng Panlalawigang Seminar sa Korespondensiya Opisyal (PSKO) na sinimulan noong 19 hanggang 20 Marso 2026 sa WVSU Center for Teaching Excellence Hall, Lungsod Iloilo.

Layunin ng aktibidad na hasain ang mga kawani at kalahok na dumalo sa tamang pagsulat ng mga opisyal na dokumento, gaya ng liham, memorandum, at kapasiyahan alinsunod sa mga pamantayan ng Komisyon sa Wikang Filipino (KWF).

Sa unang araw, binuksan ang programa sa pagbibigay ng mensahe nina Fultaym Komisyoner Carmelita C. Abdurahman, Kinatawan ang wikang Samar-Leyte, Komisyoner Alain Russ G. Dimzon, Kinatawan sa wikang Hiligaynon, Dr. Salvador P. Bacio, Jr., Direktor ng SWK-WVSU.

Sinundan ito ng pagtalakay ni Tagapangulong Atty. Marites A. Barrios-Taran ng KWF sa kahalagahan ng Atas Tagapagpaganap Blg. 335 o EO. 335, na nag-aatas sa lahat ng ahensiya ng pamahalaan na gamitin ang wikang Filipino sa mga opisyal na transaksiyon.

Matapos ito, tinalakay naman ni Dr. Jose Evie G. Duclay, Linguistic Specialist at tagapamahala para sa SWK-Visayas, ang Ortograpiyang Pambansa at ang tamang paghahanda ng korespondensiya opisyal. Sinuri niya rin ang resulta ng pre-test ng mga kalahok upang matukoy ang mga aspektong dapat pang paghusayan sa pagsulat.

Sa ikalawang araw, nagpatuloy ang seminar sa introduksiyon sa pagsasalin at masusing workshop sa editing sa ng paggabay ni Gng. Lourdes Z. Hinampas, Chief Language Researcher at Puno ng Sangay ng Salin. Para sa bahaging ito, mga kalahok ay aktuwal na nagrebisa ng kanilang sariling borador ng mga opisyal na sulatin.

Nagbigay ng mensahe ng pasasalamat ang Pangulo ng Pamantasan na si Dr. Joselito F. Villaruz sa mga kalahok na dumalo. Nagtapos sa pamamahagi ng mga koplimentaryong sipi ng aklat ng KWF ang dalawang araw na gawain.