Pinili nga Pagbinagbinag sa Pagbisikleta

Ni Early Sol Gadong

(Katapusan nga bahin)

NAGDALAGAN man duha ka tuig ang maukod ko nga pagbisikleta — ang matawag ko nga akon bikerist era. Matawhay ang dalanon sang amo sadto nga mga tion kay man ilisipon ang mga salakyan kag tawo sa karsada, gani wala ako ginakulbaan bisan hita kag batiis ko lang ang makabig nga makina sang akon salakyan. Apang sang gin-untat na ang tanan nga sahi sang lockdown kag physical distancing, amat-amat man nga nagdamo na ang salakyan nga nagapagutok sa mga dalanon. Kon sadto, makapatawhay sang utok ang magsikad pa-downtown, nangin makatalagam na ini sa pagligad sang mga binulan kay man ang kubakuba sang imo dughan tungod na sa kakulba nga mabungguan ukon masag-idan ka sang salakyan, kag indi na tungod sa kahapo sang pagsikad.

Amat-amat nga nagdyutay ang mga naga-post tuhoy sa fun rides, long rides, kag chill rides sa social media. May mga naga-post na lang sang pagsuya nga wala na kuno ang mga pandemic biker nga naganyat lang sa pagbisikleta tungod uso ini sadtong may pandemya. Nauntat na man gani ang pagbarter. Nagbalik na ang mga tawo sa paggasto sang kwarta sa mga abubot nga indi man nila kinahanglan.

Sa isa ka bahin, may kamatuoran ang obserbasyon nga nagdyutay na ang mga nagabisikleta sa mga dalanon. Wala na gid man ang mga nagapahunayhunay lang sikad sa karsada. Malaka ko na lang man ginagamit ang akon bisikleta sa pagloop sa downtown ukon Diversion pero ginagamit ko ini gihapon kon may mga balaklon ukon kaladtuan ako sa sulod lang sang amon barangay.

Dyutay na lang gid man ang mga naga-group ride pakadto sa mga banwa sa gwa sang syudad. Apang sang nangin kabahin ako sang bike count sang sini lamang nga tuig, may ara kami sang interesante nga natukiban. Sa paghiwat sining bike count, may mga volunteer (kaangay sa akon) nga nagpwesto sa nagkalain-lain nga bahin sang syudad sa takna alas-sais tubtob alas-otso sang aga, kag alas-kwatro tubtob alas-sais sang hapon. Dayon, gin-isip namon kon pila ka bilog ang mga nagalabay gamit ang bisikleta. Base sa datos nga natipon namon, mas madamo pa ang nagabisikleta subong sa nasambit nga mga oras sang sa sadtong tion sang pandemic.

Ayhan isa sa mga rason sini amo ang padayon nga pagtaas sang plete kag pagmahal sang mga balaklonon. Wala na ako makibot nga kadam-an sang mga naisip namon amo ang mga nagadala sang mga tuktukon nga bisikleta (kaangay sang akon ginbarter sa tatlo ka pares nga manok!) kag nakaordinaryo nga panapton

— mga ultimo.

Samtang nagalagas ako isip sang mga nagaagi nga bisikleta sa dalanon, ginapanumdom ko kon pila sa ila ang kaangay ko nga nagsugod bilang pandemic biker kag nagpadayon bilang regular nga bike commuter? Sin-o ayhan ang nagtudlo sa ila magbisikleta? Nakaagi man ayhan sila intra sa fun ride ukon long ride?

Piho nga may pila sa ila nga naga-group ride kay mation-tion nga tumpok sang ginapatihan ko mga mamumugon ang akon makita nga ulupdanay sa pagsikad. Siguro isa lang ka lugar ang ila ginaubrahan, ukon parehas ang lugar nga ila ginapulian. Ano ayhan ang ila ginapanumdom samtang nagaagi sila sa karsada kon diin kadam-an sang mga motorista ginakabig sila nga sablag sa pagpasirit nila dalagan? May bugal bala sila nga nabatyagan kon makalabay sila sa nagapundo nga trapik sang mga salakyan samtang tayuyon ang ila padalagan?

Luyag ko mahibaluan kon kapigaduhon lang gid bala ang nagatulod sa ila agod magpadayon sa pagsikad. Kag wala labot sa dalanon nga ila ginaagyan, ano pa ayhan ang ila luyag nga tulukon? Diin pa ayhan nila luyag makalab-ot?

Si Early Sol A. Gadong isa ka estudyante sang PhD sa Mathematics Education sa UP Open University. Isa man siya ka Assistant Professor sa Division of Professional Education sa UP High School in Iloilo, sa idalom sang Unibersidad sang Pilipinas Visayas.