Pinili nga Pagbinagbinag sa Pagbisikleta

Ni Early Sol Gadong

(Ika-apat sa 5 ka bahin)

WALA labot sa akon pagbisikleta-libot sa syudad, may mga tion man kon Sabado ukon Domingo nga nagapanghagad ang akon mga abyan nga mag-long ride pakadto sa mga banwa sa gwa sang syudad. Madamo man ako sang nakadtuan upod sa ila — Tigbauan, San Miguel, Cabatuan — apang indi ko gid malipatan ang una ko nga century ride, ukon ang akon pagbisikleta sang lapaw sa isa ka gatos nga kilometro halin sa balay pakadto sa Lambunao, kag pabalik.

Kon ano ako kahinay magdalagan, amo man ako sina kahinay magbisikleta. Rason kon ngaa masami nga nahuya ako mag-upod sa mga long ride kay man wala labot nga kulihot na ako pirmi, ginaayawan pa ang akon mga upod sa pagtulod sa akon sa mga talakladon nga bahin sang ruta. Gani para sa ginplano nga long ride pakadto sa Lambunao, nagsiling ako sa ila nga mauna lang ako ride out agod indi sila maayawan hulat sa akon.

Nagsugod ako sa pagsikad alas-singko sang aga. Paborito ko ini nga oras sa pagbisikleta kay halos wala sang salakyan sa karsada, indi mainit, kag makapagusto ako palaoy-laoy kanta sang mga sonata nga nagatukar sa akon Bluetooth speaker. Base sa akon pag-calculate sang nakaandan ko nga kadasigon sang grupo, ginpaabot ko nga maglab-otanay kami sa Janiuay. Gani natingala ako nga nagatuklad na ako pasaka sa banwa apang wala pa sila. Manug-alas syete na sadto gani nag-untat ako agod mapamahaw bag-o magsikad-tuklad liwat samtang ginakwestyon ko ang akon mga desisyon sa kabuhi.

Sa isa ka bahin, nagapati ako nga importante para sa isa ka manunudlo nga sagad sya kag damo ang nahibaluan sa iya discipline. Apang sa pihak nga bahin, paano maintindihan sang wala nakatilaw kapaslawan ang kabudlay sang estudyante nga wala sang kaangay nga kaalam? Indi lipod sa akon nga pag-abot sa akon career, indi nangin mabudlay ang akon pag-uswag. Kumbaga, palaron ako nga swak gid ang akon skillset sa akon napilian nga ubra.

Indi amo sini ang akon sitwasyon sa pagbisikleta. The struggle is real gid. Ang pagbisikleta ang nagtudlo sa akon agod likawan ang mga tinaga nga, “Hapos lang ni, class, ngaa nabudlayan kamo haw?” kay man amo sini ang ulihi nga mga tinaga nga luyag ko mabatian samtang daw mabugto ang akon ginhawa sikad-tulod sang bisikleta sa bukidnon nga banwa sang Cabatuan, Janiuay, kag Lambunao. Siling ko gani, maayo siguro kon ang tanan nga mga manunudlo naga-engage sa isa ka ulubrahon kon diin indi sila sagad. Basi pa lang mas mangin empathetic sila sa pagtudlo sa mga estudyante nga nabudlayan sa ila subject.

Sa wakas, samtang ginatulod ko ang akon bisikleta pasaka sa karsada sang Lambunao, nakita ko na nga isa-isa nga naglabay ang akon mga abyan. Sang malabot nakon ang public market, naabtan nakon sila nga nagapahuway samtang ang iban naga-selfie ukon groufie. Na-flatan gali ang isa nila ka upod gani nadugayan sila sa paglab-ot sa Lambunao. Sang nakumpleto na kami, nagsikad kami pakadto sa bantog nga Yamato Flower Farm agod magkuha sang madamo pa gid nga mga laragway. Nagpahunayhunay man kami didto sang makadali. Pagligad sang pila ka tion, nagdesisyon na kami nga magbalik na sa syudad.

Bal-an ko ang akon weakness sa larangan sang pagbisikleta. Amo gani nga sa wala pa kami nagsugod dulhog pabalik sa syudad, ginhambalan ko na ang akon mga abyan nga pwede gid sila mag-una kag indi ako nila kinahanglan nga hulaton.

Apang nag-insister gid sila nga dululungan kami maabot sa syudad. Upod namon sadto nga nagabisikleta ang isa sa mga anay ko estudyante sa high school.

“The worst is over, Mam,” siling niya. “I-enjoy mo na lang ni ang pagdulhog.”

Daw nag-flashback sa akon ang mga inoras nga nagawakal ako sa ila klase sang “Do your best” kag “Keep on going until you get the right answer, even if it’s hard.”

Daw may announcer lang sa radyo nga nagsiling, “Back to you, Bacolod!”

Gani bisan daw malupog na ako sa bag-o lang natapos nga tatlo ka oras nga pagsikad, gintinguhaan ko gid nga magpadayon. Dako man ang akon pasalamat nga mation-tion ako nga ginabalikan sang akon mga upod agod itulod sa mga takladon nga dalanon. May mga stopover man kami agod makalagas ako sa ila kag makalagas man ako sang ginhawa.

May ara kami sang ginakabig nga “lider” sa sining grupo namon nga manugbisikleta. Sya ang naga-organize sang mga long ride nga ini, halin sa ruta pakadto sa kon diin makaon, mapahuway, kag iban pa. Sa amo sini nga kahigayunan nakon na-appreciate ang quality sang lider nga kahibalo mag-motivate sa mga kaupod nga naluyahan sa ulubrahon, nagahatag sang insakto nga bulig sa insakto nga tion, kag nagapangita sang paagi agod makalagas ang mga nabudlayan nga kaupod. Dako ang akon pasalamat sa iya kay pagkaligad sang tatlo ka oras kag masobra isa ka gatos nga kilometro sang pagsikad-pahuway, nakapauli kami balik sa syudad — ulupdanay kag nag-agom sang mataas pa gid nga pagtaha sa gahum sang bisikleta, kag sa abilidad sang isa kag isa.