KWF, matagumpay na idinaos ang Ika-89 na Anibersaryo ng pagkatatag

1 of 5

Sama-samang ipinagdiwang ng mga kawani at puno ng sangay, sa pangunguna nina Tagapangulong Atty. Marites A. Barrios-Taran, kasama ang mga fultaym Komisyoner na sina Dr. Carmelita C. Abdurahman at Dr. Benjamin M. Mendillo Jr., ang ika-89 na anibersaryo ng Komisyon sa Wikang Filipino (KWF) noong ika-19 ng Nobyembre 2025.

Bagama’t ang opisyal na araw ng pagkatatag ng KWF ay 13 Nobyembre, itinakda ngayong araw ang pagdiriwang dahil sa iba’t ibang kadahilanang pang-organisasyon. Sa kabila nito, nanatiling masigla at makabuluhan ang pagtitipon na nagsilbing pagkakataon upang balikan ang makasaysayang tungkulin ng KWF sa pagsusulong, paglinang, at pangangalaga sa wikang pambansa at mga wika sa buong kapuluan.

Sa naturang pagdiriwang, ipinahayag ng pamunuan ang patuloy na pagsisikap ng Komisyon na palawakin ang mga programa at inisyatibang pangwika sa buong bansa, gayundin ang pagkilala sa dedikasyon ng bawat kawani sa pagsusulong ng adyenda ng KWF. Ang ika-89 na anibersaryo ay naging simbolo ng patuloy na paglalakbay ng institusyon tungo sa mas matatag, moderno, at ingklusibong kinabukasan para sa wikang Filipino.