Diamond Jubilee

By John Iremil Teodoro

KANG nagligad nga semana adlaw-adlaw—halin Lunes asta Sabado—may mga aktibidad kami agëd iselebrar ang ika-60 nga tuig kang pagtukod kang Departamento kang Literatura kang De La Salle University (DLSU). Katong 1965 gin-aprubahan kang Academic Council kang DLSU ang pagbukas kang undergraduate nga major sa literatura sa idalëm kang Department of Letters, nga nangin Department of Languages and Literature, asta sa nangin Department of Literature. Nalipay gid ako nga mangin parte sa pagselebrar kadyang milestone kang amën departamento.

Importante para sa sangka manunulat nga may ginakabig nga literary home kag ang La Salle rëgya sa Manila ang ginakabig ko nga balay ko bilang manunulat. Biente dos anyos ako kang 1995 kang una ako makasëlëd sa tarangkahan kang unibersidad nga dya bilang katapu kang una nga batch kang mga estudyante kang Master of Fine Arts (MFA) in Creative Writing. Rëgya mapalad gid ako nga nangin estudyante kang mga pinakasagad nga mga manunulat kang pungsod: Cirilo F. Bautista, Isagani R. Cruz, B.S. Medina Jr, kag Marjorie Evasco. Wara ko namaestro si Efren Abueg pero sara tana sa mga panelist sa akën nga MFA thesis.

Kadëngganan ko nga makapartisipar sa Literary Lives: The Department of Literature Diamond Anniversary Lectures (On the Lasallian Legacies of National Artist Cirilo F. Bautista, Dr. Marjorie Evasco, and Dr. Isagani R. Cruz) kang Huwebes, Hunyo 4. Haros bilog dya nga adlaw kang serye kang tatlo ka lektura: si Dinah Roma para kay Bautista, ako para kay Cruz, kag si Ronald Baytan para kay Evasco.  Kanami lang sa pamatyag nga makapasalamat ako kag mapasidënggan namën ang amën mga manunulod paagi sa sangka pormal nga lektura agëd isaysay ang andang mga legasiya bilang gung-an nga mga manunulat kag mga busalian nga manunudlo.

Bahël ang utang nga kabaraslan ko sa De La Salle University kapin pa gid sa Department of Literature. Magluwas nga libre ang akën MFA in Creative Writing kag PhD in Literature hay gintugruan nanda ako kang scholarship, ang amën man nga Departamento ang nagbëël kanakën bilang full time faculty kang ginpahalin ako sa Miriam College kang 2016 tëngëd sa epekto kang K-12 program. Gindugangan abi kang darwa ka tuig ang high school amo nga wara ukon isut lang ang ma-college kang tuig nga to amo nga ginpa-forced early retirement kami nga mga manunudlo kang general education subject sa Miriam kon sa diin pito man ka tuig ako nga nangin manunudlo. Ako ang tagapangulo kang Filipino Department sa Miriam kang gin-anunsiyar ang amën mandatory early retirement. Daw gintakpan ako kato kang langit hay nanamian kag naga-enjoy ako magtudlo rugto kag rapit dya sa balay namën sa Rosario, Pasig.

Tuman ang grasya nga gintugro kang Diyos kanakën paagi sa La Salle. Kadya full professor rën ako kag direktor pa kang Bienvenido N. Santos Creative Writing Center (BNSCWC). Kang estudyante pa ako kag ginahimu nga side kick ni Papa CFB kag research assistant (Read: uripën) ni Isagani R. Cruz, wara gid ako nakapanëmdëm nga sa pira ka adlaw mangin full professor man ako parehas nanda kag mangin direktor pa kang BNSCWC nga kato si Bautista ang direktor bilang tana ang founding director general kang tukudon dya kang 1991.

Amo ria nga kon kis-a, kon nakapuyan rën gid ako kag natak-an rën gid rëgya sa Manila kag gusto ko rën mag-uli for good sa Antique, ginapamensar ko rën lang nga dapat batunon ko kag pas-anën dyang mga reponsabilidad ko rëgya sa La Salle bilang pagpasalamat kag pagbalikid sa utang nga kabaraslan ko sa dyang institusyon. Payback time para kanakën sa tanan nga mga mayad nga nadangtan ko rëgya bilang manunudlo kag manunulat.

Sadya ang alumni homecoming namën sa roofdeck kang Henry Sy Sr. Hall kang nagligad nga Sabado. Duro nga mga alumni kang programang literatura ang nag-arabot. Ang pira ka classmate ko sa MFA nag-aragto man. Ti sadya ang mga tsika nga buta kang mga harakhak kapin pa gid kon ginaestoryahan namën kon daw ano kami ka sabad kag ka gahëd kang mga estudyanta pa kami may tatlo rën ka dekada ang nagligad.

May mga estudyante man ako kato nga nag-aragto man. Pagkatapos kang ikatlo nga termino nga dya, mapulo rën ako ka tuig nga nagbalik rëgya sa La Salle bilang full time faculty. Amo ria nga medyo rakë rën man ako nga naestudyante kag naging mentee sa andang mga tesis kag disertasyon. Ang iban gani indi ko rën matandaan ang mga ngaran. Mayad lang may mga estudyante ako nga sanda ang nagparapit kag nagpakilala. Nakapustura sanda bilang mga career woman amo nga gamayan ko lang sanda indi makilala.

Kapuy man kami tanan sa Department tëngëd sa sangka semana nga mga aktibidad, nalipay kami kag nakuntento sa amën pagselebrar. Ang lahëg gani namën, sa ika-70^th year, mas bonggahan pa namën. Nagkadlaw lang ako. Sa tiyempo nga to, retired rën ako kag full time nga nagahardin kag nagasulat sa Aningalan. Sigurado sa tiyempo nga to tamadan rën ako magdulhog dya sa Manila para magselebrar.

Pero siyempre sa akën kasingkasing maselebrar man ako gihapon. Bisan rugto rën ako sa Aningalan, indi ko man gihapon malipatan ang La Salle hay igadar-ën ko dya sa akën tagipusuon bilang literary home ko. Hambal gani nanda, home is where the heart is. Ang De La Salle University rëgya lang pirme sa akën tagipusuon, sa tagipusuon ko bilang manunulat.

***

Si John Iremil Teodoro nga taga-San Jose de Buenavista, Antique sangka full professor sa Departamento kang Literatura kang De La Salle University sa Manila kon diin tana man ang direktor kang Bienvenido N. Santos Creative Writing Center. Nangin Sekretaryo Heneral tana kang Unyon ng mga Manunulat sa Pilipinas (UMPIL). Ginbaton na ang S.E.A. Write Award halin sa Kaharian kang Thailand katong 2019.