DENR VI, WVSU-CAF, kag Panay Energy Development Corporation,  magaduso sang Handumanan Phase II

Ang Department of Environment and Natural Resources (DENR) Region VI, sa pagpanguna ni Regional Executive Director Raul L. Lorilla, nagpakig-upod sa mga opisyales sang West Visayas State University – College of Agriculture and Forestry (WVSU-CAF) kag Panay Energy Development Corporation (PEDC) para pasangkaron ang Handumanan Reforestation and Carbon Sink Project (Phase II) sang nagligad lang nga Enero 12, 2026, sa opisina sang PEDC.

Upod man sa sini nga importante nga aktibidades sanday Provincial ENR Officer sang Iloilo, For. Salvador C. Manglinong Jr. kag Community ENR Officer sang Barotac Nuevo, Engr. Glen S. Del Norte, kaupod ang ila mga empleyado agud maghatag sang teknikal nga suporta para sa proyekto.

Ang pagtililipon nangin dalan agud pormal nga maistoryahan kag maplastar ang mga tikang para sa Handumanan Reforestation and Carbon Sink Project (Phase II) naangot man ini sa madinalag-on nga resulta sang nauna nga bahin sang proyekto, kon diin sobra sa 340,000 ka mga puno sang kahoy ang natanom sang mga boluntaryo nga nagbuylog sa amo nga lihok. Luyag sang DENR VI kag kaupod nga mga ahensya nga pasangkaron pa gid ini nga legasiya para sa ikaayo sang palibot kag publiko.

Ang nasambit nga proyekto nagatuyo nga palaparon ang 150-ektarya nga reforestation site sa banwa sang Lambunao, Iloilo, agud mangin mas mabakod nga “carbon sink” ukon lugar nga nagahigop sang carbon dioxide halin sa hangin. Sa sini nga ikaduha nga hugna, igatanom ang mga tumandok ukon endemic/native nga sahi sang mga kahoy nga natural nga nagatubo sa probinsiya.

Daku ang mangin kontribusyon sini nga tikang sa paghagan-hagan sa malain nga epekto sang climate change ukon ang indi normal nga pagbag-o-bag-o sang klima, samtang ginasiguro nga ang masunod nga henerasyon may yara pa sang makita kag mapuslan nga dunang manggad.

Ang pagbinuligay sang gobyerno, sektor sang edukasyon, kag pribado nga kumpanya isa ka maayo nga ehemplo sang pag-ugyon para sa kaayuhan sang kadam-an. (DENR6)