BAHANDING BILIDHON: Tumandok, Du-og kag mga Sinulatan

Ni Dante Villanueva Aguilar

2025 Ten Outstanding Ilonggos of Iloilo City (TOIIC)

Sa madugay nga tinion karon ko gid lamang natalupangdan ang nagaisahanon nga rebulto sa maligwin nga bahin sang Molo Plaza. Masami man nga ang kapehan sa molo ang ginahimo namon nga tilipunan apang nalabaylabayan ko lamang ining rebulto. Kon wala pa ako gin-updan sang akon iloy pagkatapos sang domingo nga misa, wala ko pa natalupangdan nga may angot gali sa amon kabuhi ang batongdaan.

Didto ko gid lamang namulalongan nga may ara gali nga kasulatan nga nakapaskel sa rebulto nga sa akon kakibot kapareho sang apelyido sang akon Nanay Sepa nga Villanueva. Matuod gid man gali ang masami ginasugid sadto sa amon ni Nanay nga sa plaza may malayo nga himata sila kuno nga ginpasidunggan paagi sa rebulto sini nga ginpatindog sang gobyerno bilang pagkilala sa maayo sini nga mga hinimuan.

May leksyon ako nga nakuha sa nasambit nga realisasyon. May mga butang, tawo kag duog nga kon kaisa wala naton ginahatagan kabilinggan sa pagpati nga ordinaryo lamang ini sa aton matag-adlaw nga pagkabuhi. Kinahanglan pa ang iban nga tawo ang makatukib sang pagkamalahalon sini bag-o naton makita ang kabilidhon sini.

Karon sa tagsa nga pag-usoy ko sa mga dalanon kon ako nagapanglakaton, mapanilagon na ako sa akon palibot. Sa indi mapaktan nga tion basi may mga palatandaan dira nga ayhan natabunan na ukon nalimtan na sa kadugay nga tinion. Paagi sa pagtukib sang mga nalimtan na nga maragtas mapaambit ko man ang kinaalam agod masayran man sang iban ang nahinago nga kaalaman nga nangin bahin man sang kasaysayan.